អន្តរជាតិ៖ រដ្ឋបាលតាលីបង់ក្នុងប្រទេសអាហ្វហ្គានីស្ថានបានប្រកាសថា វិទ្យាល័យសម្រាប់សិស្សស្រីនឹងត្រូវបិទរហូតដល់មានផែនការថ្មីដែលស្របតាមច្បាប់អ៊ីស្លាម និងវប្បធម៌អាហ្វានីស្ថានត្រូវបានអនុម័ត។ ការបិទវិទ្យាល័យសម្រាប់សិស្សស្រីនេះមានន័យថា សិស្សស្រីដែលមានអាយុលើសពីថ្នាក់ទី៦ នឹងមិនអាចចូលរៀនបានទេ។

ទីភ្នាក់ងារសារព័ត៌មាន Bakhtar News Agency បានដកស្រង់សេចក្ដីជូនដំណឹងរបស់រដ្ឋាភិបាលតាលីបង់នៃអាហ្វានីស្ថានយកមកចុះផ្សាយថា៖ «យើងជូនដំណឹងដល់វិទ្យាល័យក្មេងស្រីទាំងអស់ និងសាលាទាំងនោះដែលមានសិស្សស្រីលើសពីថ្នាក់ទី៦ ថាពួកគេត្រូវឈប់សម្រាករហូតដល់មានបញ្ជាថ្មី»។

អ្នកនាំពាក្យក្រុមតាលីបង់ លោក Inamullah Samangani បានប្រាប់ ភ្នាក់ងារសារព័ត៌មាន AFP ថារឿងនេះជាការពិតដោយមិនពន្យល់ហេតុផលភ្លាមៗនោះទេ ខណៈអ្នកនាំពាក្យក្រសួងអប់រំលោក Aziz Ahmad Rayan បាននិយាយថា៖ «យើងមិនត្រូវបានអនុញ្ញាតឱ្យធ្វើអត្ថាធិប្បាយលើរឿងនេះទេ»។

អ្នកនយោបាយអាហ្វហ្គានីស្ថាននិងអ្នកកាសែតដែលមានមូលដ្ឋាននៅទីក្រុងឡុងដ៍លោកស្រី Shukria Barakzai បានប្រាប់សារព័ត៌មាន Al Jazeera ថា ការបិទវិទ្យាល័យនេះគឺស្មើនឹងបិទសាលាសម្រាប់សិស្សស្រីទាំងមូលព្រោះនៅខេត្តភាគច្រើននៃអាហ្វានីស្ថានស្ទើរតែគ្មានសាលាបឋមសម្រាប់សិស្សស្រីនោះទេ។

លោកស្រីថា៖ «វាជាការខកចិត្តណាស់ដែលក្មេងស្រីដែលកំពុងរង់ចាំថ្ងៃនេះត្រឡប់ទៅសាលាវិញ។ វាបង្ហាញថាពួកតាលីបង់មិនគួរឱ្យទុកចិត្ត និងមិនអាចបំពេញតាមការសន្យារបស់ពួកគេ។ […] វាបង្ហាញថាពួកតាលីបង់គឺដូចពីមុនដែរ គឺពួកគេប្រឆាំងនឹងការអប់រំរបស់ក្មេងស្រី»៕